Allah ha u naxariistee Meydadka Taliyihii Ciidamada Amaanka Kismaayo Ciise Kaambooni iyo Labo kamid ah Ilaaladiisii oo maanta Kismaayo lagu Aasay

Kismaayo (Ceegaag Online) Allahaa u naxariistee waxaa manata qabuuraha Waqooyi ee magaalada Kismaayo lagu aasay Taliyihii Ciidamada amaanka Maamulka Jubbaland ee magalada Kismaayo Ciise Maxamed Alaake oo loo yaqaanay Ciise Kaambooni iyo labo kamid ah Ilaaladiisa, kuwaasoo sida ay sheegeen masuulyiinta Maamulka uu dilkooda ka dambeeyay nin uu adeer u ahaa Taliyaha oo markii hore kasoo goostay xarakada Al shabaab kadibna ilaalo u ahaa marxuumka la dilay ee Ciise Kaambooni.
Aaska Taliyihii ciidamada amaanka magaalada Kismaayo iyo 2 kamid ah ilaaladiisa ayaa waxaa kasoo qeyb galay masuulyiin kala duwan iyo qeybaha kala duwan ee dadweynaha ku nool magaalada Kismaayo.
Masuulyiin ay kamid yihiin wasiirka arrimaha bulshada, wasiirka arrimaha gudaha iyo amniga maamulka Jubbaland oo hadalo kooban ka jeediyay goobta aaska ayaa tacsi kadib waxaa ay sheegeen inay qaadi doonaan go’aamo ad adag oo ku wajahan Al shabaab.
Geerida allahaa u naxariistee Taliyihii hore ee ciidamada amaanka degmada Kismaayo Ciise Kaambooni ayaa si weyn looga dareemay gudaha magaalada Kismaayo iyo guud ahaanba gobbolada Jubbooyinka, waxaana Ciise Kaambooni lagu xasuusan doonaan waxqabadyo kala duwan oo uu ka qabtay deegaanada Jubbooyinka kuwaasoo ay kamid tahay amaanka magaalada kismaayo oo uu dib u soo celiyay markii loo magacaabay xilka taliyaha.

Ceegaag Online

Xafiiska wararka Kismaayo