Xuska 54-guurada aas aaska ciidanka xoogga dalka oo lagu qabtay Muqdisho “Sawirro”

Xuska 54-guurada ka soo wareegtay aas aaska ciidanka xoogga dalka 12-kii April ee sanadkii 1960-kii oo lagu qabtay Muqdisho ayaa waxaa ka qeyb galay Madaxweynaha Jamhuuriyadda Soomaaliya, mas’uuliyiin ka tirsan labada gole ee dowladda, Taliyeyaasha ciidamada xoogga dalka, Booliska, Nabad sugidda, badda, saraakiisha ciidamada qalabka sida, fanaaniinta kooxda Horseed ee ciidanka xoogga dalka, mas’uuliyiin ka socotay dalalka saaxiibada la ah Soomaaliya, ururka haweenka qaranka iyo marti sharaf kale.

Ugu horeyn Madaxweynuhu waxa uu salaan sharaf ka qaatay cutubyo ka tirsan ciidamada xoogga dalka, waxaana uu xariga ka jaray hool weyn oo shirarka loogu talagalay, kaasi oo laga hirgeliyay gudaha xarunta Wasaaradda Gaashaandhigga

Intaasi kaddib Madaxweynaha iyo mas’uuliyiintii la socotay waxa ay u gudbeen goob ay ciidamada ku soo bandhigeen gaado ka cayaarka,waxaana socod ku soo maray qeybaha kala duwan ee ciidanka xoogga, iyaga oo wata gaadiiidka dagaalka, waxaana ciidamada kumandooska ay ee Dalab oo qalabkooda sita ay goobta ku soo bandhigeen farsamooyin casri ah.

Markii ay dhamaatay bandhigaasi ayaa madaxda waxa ay fadhiisteen hoolka munaasabadda lagu qabtay, halkaasi oo ay fanaaniinta kooxda Horseed ee  ciidanka xooga dalka ku soo bandhigeen ruwaayad ka loogu magac daray “Muruq wada jiraa midnimo ayaa u daawa ah” oo uu soo dirayay Abwaanka Soomaaliyeed Maxamuud Cabdullaahi Ciise Singub.

Waxaa bilaabatay khudbadihii xafladda laga jeedinayay, waxaana ugu horeyn goobta hadal ka jedisay Guddoomiyaha Ururka Haweenka Qaranka Batuulo Sheekh Axmed Gaballe, iyadoo hambalyo u dirtay ciidanka xoogga dalka Soomaaliyeed meelkasta oo ay joogaan, waxaana ay sheegtay in haweenka Qaranka ay garab taaganyihiin ciidamada.

Guddoomiyaha gobolka Benaadir ahna duqa Muqdisho Mudane Xasan Maxamed Xuseen Muungaab ayaa ka hadlay ahmiyadda uu ciidanka Soonaaliyeed u leeyahay qaranka, isagoo xusay in ciidamada ay u taaganyihiin isku xiirka midnimada umada Soomaaliyeed.

Taliyaha ciidanka booliska Soomaaliyeed Jeneraal Cabdixakiin Daahir Saciid Saacid ayaa u hambalyeeyay ciidanka xoogga dalka sanadguuradii 54aad ee ka soo wareegtay aas aaska ciidanka.

Agasimaha hay’adda Nabab sugidda iyo sirdoonka Qaranka  Sareeyo Gaas Bashiir Maxamed Jaamac oo isna hadal kooban ka jeediyay xafladda ayaa sheegay in ay marag ma doonta tahay in ciidanka xooga dalka uu soo laabtay, islamarkaana ay diyaar u yihiin in ay la shaqeeyaan.

Taliyaha cidanka xoogga dalka Soomaaliyeed Sareeyo Guuto Daahir Aadan Cilmi Indho qarsho ayaa ka hadlay waxyaabihii u qabsoomay ciidanka xoogga dalka iyo guulaha ay gaareen, isagoo ku booriyay inay sii labo jibaaraan howlgalka ka dhanka ah Al-Shabaab.

Wasiirka Gaashaandigga ee Xukuumadda Soomaaliya Mudane Maxamed Sheekh Xasan Xaamud ayaa ka hadlay isbadalada Wasaaraddu ay ka damacsantahay ciidanka, isagoo xusay in ciidamada lagu qiimeyn doono mushaaraadkooda darajooyinka, islamarkaana la kordhin doono mushaaradka la siinayo naadafada ciidanka xoogga dalka iyo kuwa agoonta ah..

Madaxweynaha Jamhuuriyadda Soomaaliya Mudane Xasan Sheekh Maxamuud oo munaasabadda soo xiray ayaa ugu horeyn hambalyo u diray ciidanka xoogga dalka, saraakiisha, saraakiil xigeennada, alifleyda, dableyda iyo xaasaskooda in sanadkaan kiisa kale ay ku gaaraan horumar.

Madaxweynuhu waxa uu hoosta xariiqay in ciidamada xoogga dalka oo ku shaqeynaya xaalado adag ay ku guuleysteen inay dalka intiisa badan ka xoreeyaan maleeshiyada Al-Shabaab ee Al-Qaacidda, isagoo ku booriyay ciidamada qalabka sida ay sii dar dargeliyaan howlgalka ka dhanka ah kooxaha argagixisada.

Madaxweyne Xasan Sheekh ayaa soo hadal qaaday dhibaatada lagu hayo muwaadiniinta Soomaaliyeed ee ku dhaqan dalka Kenya, isagoo xusay in madaxda dalkaasi uu kala hadlay sidii loo joojin lahaa tacadiyada iyo dhibka lagu hayo Soomaalida.

Xuska maalinta ciidamada xoogga dalka ee sanadkan ayaa kusoo aadeysa xilli ay ciidamadu horumar balaaran ka gaareen howlgallada ay dalka uga xoreynayaan maleeshiyaadka Al-Shabaab, waana sanadguuradii 54-aad ee ka soo wareegtay aas’aaska ciidanka xoogga dalka oo ku beegan maanta oo ay taariikhu tahay 12 April.