War-Culus: Wasiirka Amniga Qaranka ee DF-Somalia Cabdikariin Xuseen Guuleed oo is-casilay……

Wasiirka amniga qaranka ee Soomaaliya, Cabdikariin Xuseen Guuleed ayaa goor dhowayd iska casilay jagadiisa.

Cabdikariin Xuseen oo ay saaxiibbo dhow yihiin madaxweyne Xasan Sheekh Maxamuud ayaa is-casilay kaddib markii xaaladda ammaanka ee magaalada caasimadda ah ee Muqdisho ay sii xumaatay tan iyo markii uu xilka qabtay.

Cabdikariin ayaa is-casilaaddiisa ka sheegay warbaahinta ku hadasha afka dowladda federaalka Soomaaliya.

Is-casilaaddiisa ayaa timid saacado kaddib markii dagaalyahanno ka tirsan cutubka ismiidaamiyeyaasha Al-Shabaab ay weerareen xarunta baarlamaanka federaalka Soomaaliya xilli xildhibaannada ay halkaasi ku lahaayeen kulan.

Muddadii 20-ka bilood ee uu Cabdikariin Guuleed xilka hayay, kooxda Al-Shabaab waxay weerartay dhismeyaasha maxkamadaha, safaaradda Turkiga, xarunta Qaramada Midoobay ee Muqdisho, xarunta madaxtooyada Soomaaliya iyo baarlamaanka.

Ceegaag Online 

Xafiiska Wararka Kismaayo-Somalia