Gen: Farataag oo Turkiga Gaaray Kana Warbixiyay Ujeedada Safarkiisa

Madaxweeyne ku-xigeenka 1-aad ee maamulka KMG ee Jubba, C/laahi Sheekh Ismaaciil Fartaag oo dhawaan safar ku aaday dalka Turkiga, ayaa ka warbixiyay ujeedooyinka safarkiisa, isagoo sheegay in intii ay joogeen dalka Turkiga ay la kulmeen madax ka tirsan dowladaasi.

Madaxweeyne ku-xigeenka oo safarkiisa uga warbixinayay Warbaahinta ayaa sheegay in dalka Turkiga ay u aadeen si ay dowladda Turkiga ugala hadlaan arimo ay kamid yihiin nabadgelyada, dhinacyada horumarinta deegaanka iyo weliba sidii gobollada Jubooyinka ay dowladda Turkigu uga bilaabi lahayd mashaariic horumarineed.

“Waxaan la kulannay masuuliyiin ka tirsan dowladda Turkiga, waxaan kala hadalnay arimo badan oo ay kamid yihiin sidii dowladda Turkiga ay nooga caawin lahayd dhinacyada horumarka,” ayuu yiri madaxweeyne ku-xigeenka oo u waramayay warbaahinta.

Mudane C/laahi Sheekh Ismaaciil Fartaag iyo wafdigii uu hogaaminayay ayaa dhinaca kale kulamo la qaatay jaaliyadda Soomaaliyeed ee kasoo jeeda Jubooyinka ee ku sugan dalka Turkiga, waxayna uga warbixiyeen xaaladda guud ee deegaanada Jubooyinka.

Madaxweeyne ku-xigeenka iyo wafdigiisa ayaa la filayaa in maalmaha fooda nagu soo hayo ay dib ugu soo laabtaan magaalada Kismaayo ee xarunta gobolka J/hoose.

Ceegaag Online