WADADA MAKA ALMUKARAMA MUQDISHO OO SHACABKII LOO DIIDAY

 

Ciidamo katirsan Nabad Sugida Dowlada Soomaaliya iyo booliis ayaa saakay gabi ahaan xiray laamiga Maka Al-Mukarama ee Magaalada Muqdisho, waxaana wadadaasi loo diidayaa in ay maraan gaadiidka dadweynaha .

Ciidamada ayaana ku amraya gaadiidka in ay ka laabtaan laamigaasi, waxaana dadka gaadiidka wata la weediinaya in ay yihiin Masuul katirsan Dowlada Soomaaliya hadii uusan aheyna waxaa lagu amrayaa hadal la’aan in uu dib uga laabto wadadaasi.

Dad badan oo ka shaqeeya Hay’ado iyo kuwa Dowlada Siyaabo kale ugu shaqeeya ayaa xitaa loo diiday in ay maraan laamiga, waxaana laamiga maristiisa loo ogolaa kaliya Xildhibaan, Sargaal iyo waxii kasii sareeya oo Dowlada katirsan.

Ciidamada ayaa dadka ka celinaya goob aysan suurto gal  aheyn in ay dib ugu laabtaan gaadiidka maadaama gawaari badan ay isku daba xiran yihiin, waxa ayna kugu qaadaneysaa in aad laabato ama aad horey usocoto in kabadan 30-daqiiqo.

Lama oga sababta ka dambeysa xirnaashaha laamiga Maka Al-Mukarama ee Magaalada Muqdisho, waxaana arintan ay dhib badan ku tahay dadka wadadaasi isticmaala oon mar hore la ogeysiin in la xirayo wadadaasi oo ah wadada ugu Mashquulka badan Magaalada Muqdisho.

Ceegaag.com