Ra’iisul Wasaaraha oo sheegay in Gaalkacyo ka laabanayaan markii Nabad la gaaro

November 30 (Ceegaag)— Ra’iisul Wasaaraha Soomaaliya Cumar Cabdirashiid Sharmarke iyo Wafdi uu hoggaaminayo oo uu ka mid yahay Madaxweynaha Koonfur Galbeed Shariif Xasan Sheekh Aadan, Wasiirro iyo Xildhibaanno ayaa galinkii danbe ee maanta gaaray magaalada Gaalkacyo ee xarunta gobolka Mudug, halkaasoo soo dhaweyn diiran loogu sameeyey. Wafdiga ayaana deegaanka u soo gaaray dhamaynta colaadii ka dhacay Gaalkacyo.
Ra’iisul Wasaare Sharmarke oo soo dhaweynta kadib Saxaafadda la hadlay ayaa sheegay si deg deg in lagu soo afjari doono colaada dhiiggu ku daatay ee degmada Gaalkacyo ka dhacday, isagoo xusay maalinta barri in ay kulan guud wada qaadan doonaan Madaxweynaha Puntland Mudane Cabdiweli Maxamed Cali Gaas iyo Madaxweynaha Galmudug Mudane C/kariin Xuseen Guuleed, wuxuuna dhinaca kale rajo ka muujiyay colaadii dhacday in wada hadal lagu dhamayn doono.
“Aad ayaan uga xumahay dagaalka ka dhacay Gaalkacyo maalmihii u dambeeyey, waana dagaal ay wax yeelo ka soo gaartay dad shacab ah, madaama dushooda lagu dul dagaalamay. Waxaan Gaalkacyo u nimid in aan soo afjarno colaada maalmahan socotay, halkaan waxaan dib uga noqoneynaa markii ay nabaddu shaqayso oo dadkii barakacay guryahoodii ku soo laabtaan. Ayuu yiri R.Wasaare Cumar.
Xaaladda Magaaladda Gaalkacyo ayaa dagan saacadihii la soo dhaafay, waxaana halkaas horey ugu sugnaa wafdi uu Hoggaaminayo Wasiirka Arrimaha Gudaha iyo Federaalka C/raxmaan Odawaa iyo Taliyaha Ciidanka Xoogga dalka Soomaaliyeed S/G Maxamed Aaden Axmed kuwaas oo kulamo kala duwan la qaatay dhinacyada ay xiisaddu u dhexeyso.
Ceegaag.com