Bam gacmeed lagu weeraray saldhig ay ciidamada puntland ku leeyihiin waqooyiga Gaalkacyo.

Wararka ka imaanaya caawa magaalada Gaalkacyo ee gobolka Mudug ayaa sheegaya in weerar bambaano oo lagu qaaday saldhig ay ciidamada puntland ku leeyihiin waqooyiga Gaalkacyo ay ku dhaawacmeen askar.

Afar askari ayaa lagu soo warramayaa inay ku dhaawacmeen qaraxyada kuwaasi oo ka mid ahaa ciidamada ku sugnaa Saldhiga booliska oo ku yaalla xaafadda Horumar ee waqooyiga magaalada Gaalkacyo.

wararku waxa ay sheegayaan inay baxsadeen kooxihii weerarka gaystay mana jirto ilaa hada wax war ah oo kasoo baxay saraakiisha booliska ee maamulka Puntland.

Askarta dhaawacantay ayaa la dhigay isbitaalka magaalada Gaalkacyo, halkaas oo lagu daweynayo, sida ay saraakiisha caafimaadku sheegeen.

habeen ka hor ayey ahayd markii sidaan oo kale weerar bambaano lagu qaaday saldhiga taasi oo saraakiisha booliska ay ku eedeeyeen Kooxda Al shabaab.