Wafti Balaadhan oo ka socday Turkiga oo lagu Weeraray Duleedka Magaalada Gaalkacyo

Wararka ka imanaya magaalada Gaalkacyo ayaa sheegaya in weerar ay ku qaadeen maleeshiyo beeleed ku sugnayd meel u dhexeysa magaalada Gaalkacyo iyo Bacaadweyn ay rasaas ku fureen kolonyo gaadiid ah oo uu la socday sarkaal sare oo ka tirsan ururka Tika ee dalka Turkiga. 

Madaxii wafdiga ka socday dalka Turkiga Mustafa Hashim ayaa ku dhaawacmay weerarka lagu qaaday kolonyada gaadiidka uu la socday.

Mustafa Hashim iyo wafdigiisa ayaa waxay ka soo ambabaxeen magaalada Garowe iyagoo ku sii jeeday magaalada Gaalkacyo. 

Xaalada caafimaad ee Mustafa Hashim oo ah madaxa qaarada Afrika ee hayada samafalka ee Tika ayaa la sheegay inay wanaagsan tahay isla markaana uusan dhaawiciisa u baanhayn in dibadda loo qaado dhaawacana uu ka soo gaaray cagta hooose. Waxana la sheegay in lagu daweynayo magaalada Gaalkacyo.

Maleeshiyada weerarka geysatay ayaa la sheegay in mid kamid ah uu ku dhintey is rasaaseyn dhex martay iyaga iyo ciidamada Booliska mid kalana uu ku dhaawacmay, waxaana sidoo kale halkaas ay ciidamada booliska ay gacanta ku dhigeen saddex ka mid ah maleeshiyo beeleedkii weerarka geysatay. 

Sarkaalkan dhaawaca ka soo gaaray weerarkan ayaa noqonaya kii ugu horeeyey ee ku dhaawacma dalka Soomaaliya tan iyo markii dowlada Turkiga ay bilowday inay gurmad degdeg ah u fidiso shacabka Soomaaliyeed bartamihii sanadkii hore.