Al-Shabaab oo la wareegtay deegaanka Yaaqbari-weyne, kadib dagaal ka dhacay

September 18 (Ceegaag)— In ka badan 10-ruux ayaa ku geeriyootay, kadib dagaal xoogan oo saaka ka dhacay deegaanka Yaaqbari-weyne ee Gobolka Shabeellaha Hoose.
Dagaalkan ayaa ka dambeeyay markii Xoogag ka tirsan Al-Shabaab ay wareegeen labo saldhig ciidamada dowladda deegaankaas ku lahaayeen.

Wararka ayaa intaa ku daraya in ciidamadii milateriga ee deegaankaas ku sugnaa ay isaga baxeen, waxaana si buuxda deegaanka ula wareegay Al-Shabaab

Al-Shabaab ayaa sheegtay inay weerarka ku qabsadeen labo baabuur, waxaana warar aan wali la xaqiijin sheegayaan inay jiraan askar nolosha lagu qabtay.

Dadka deegaanka ayaa sheegaya in xaalada ay tahay mid degan, hase ahaatee ay ka cabsi qabaan in mar kale uu dagaal ka dhaco.

Deegaankan ayaa ku dhow degmada Wanlaweyn ee Gobolka Shabeellaha Hoose, waxaana uu ku yaal wadada dheer ee isku xirta Muqdisho iyo Baydhabo.

Al-Shabaab ayaa weerar qorsheysan ku qaadayay saldhigyada ciidamada ay ku leeyihiin Gobolka Shabeellaha Hoose, waxaana weeraradaas ay keeneen in Ciidamadii dowladda iyo AMISOM ay isaga baxaan deegaano dhowr ah,waxaa iyana ay gacanta ku dhigeen janaale .
Ceegaag- muqdisho