Ciidamada Nabad Sugida Qaranka ayaa Howlgal ay Sameeyeen Waxa ay kusoo Qabteen Nin la Sheegay

 

Ciidamada Nabad Sugida Qaranka ayaa howlgal ay sameeyeen waxa ay kusoo qabteen nin la sheegay habeen hore in  Xaafad katirsan Degmada Yaqshiid uu ku dilay Nin Garsoore ahaa oo Magaciisa lagu sheegay Macalin Abshir.

Xaafada uu Dilku ka dhacay ayaa la sheegay in Ciidamo katirsan Nabad Sugida ay howlgal ka sameeyeen kuna soo qabteen nin ay ku eedeeyeen in uu ka dambeeyay Dilka Garsooraha lana tilmaamay in uu ka tirsan yahay Dagaalyahanada Al-Shabaab.

Afhayeenka Wasaaradda Amniga Gudaha Maxamed Yuusuf Cismaan oo Warbaahinta la hadlay ayaa sheegay in Ciidamada Nabad Sugida oo gacan ka helayay dadka Deegaanka ay ku guuleesteen in ay soo qabtaan nin katirsan Al-shabaab uu sheegay in uu ka dambeeyay Dilka Garsoore Macalin Abshir iyo dad kale oo badan.

Maxamed Yuusuf ayaa tilmaamay in Ninkan ay qabteen uu ahaa Dagaalame katirsan Al-Shabaab una qaabilsanaa Kooxdaasi sida uu sheegay Degmooyinka Yaqshiid iyo Dayniile, waxa uuna intaa raaciyay in ninkan iyo rag kale ay isku koox yihiin ay dilal badan ka fuliyeen Magaalada.

Ciidamada Nabad Sugida Qaranka iyo kuwa booliiska ayaa Magaalada Muqdisho waxa ay ka wadaan howlgalo balaaran, waxaana ciidamado badan lagu arkaa isgoosyada Muhiimka ah ee Muqdisho iyo goobo kale oo Magalaada katirsan.

Ceegaag.com