Duqa Muqdisho Oo Kulan Istanbuul Kula Qaatay Dhigiisa Turkiga

Guddomiyaha G/Banadir Ahna Duqa Magaalada Muqdisho S/Guuto Xasan Maxamed Xuseen (Muungab) oo booqasho rasmi ah ku joogo magaalada Istanbuul ee dalka Turkiga ayaa maanta kulan la qaatay dhiggiisa Magaalada Istanbuul Mr Kadir TOBAS. Labada Mas’uul oo shirka si wada jir ah u gudoominayay ayaa ka wada hadlay arrimo dhowr ah oo ay ugu muhiimsaneed

1. Sidii loo sii dar-dar galin lahaa howlaha mataanaynta labada Magaalo 2. In iskaashi laga sameeyo dhanka tababaridda shaqaalaha kala duwan ee Dowladda hoose ee Muqdisho iyadoo la is dhaafsanayo khubarro iyo macallimiin takhasusyo kala duwan leh.

Gabagabadii shirka ayaa lagu balamay in laba koox oo Injineero ah kana kala socda D/Hoose ee Muqdisho iyo tan Istanbull ay ka wada doodaan barnaamijka maaraynta biyaha iyo Bulaacadaha iyo sidoo kale hab dhismeedka wadooyinka iyadoo leesla fiiri doono qorshe dokumiintari ah oo ay soo diyaarisay D/Hoose ee Muqdisho.

Duqa magaalada Muqdisho ayaa barito u duuli doono Magaalada Ankara ee Caasimadda Turkiga halkaasoo uu kulan rasmi ah kula qaadan doono Gobolo tooraha Ankara.

Labada mas’uul ayaa la filayaa in ay ka wada hadlaan arrimaha xiriirka labada Gobol iyo iskaashiga dhanka horumarinta.