FAAHFAAHIN: Dagaal Ahlusunna iyo Dowladda Soomaaliya ku Dhexmaray Gobolka Galguduud

July 20, 2015 (Ceegaag) — Inta la ogyahay Shan Ruux ayaa ku Dhintay Dagaal ku dhexmaray maanta Ciidamada Dowladda Somalia iyo xoogag ka tirsan Ahlusunna deegaan lagu magacaabo Laandheer oo ka tirsan Gobolka Galguduud ee Bartamaha Soomaaliya.
Shanta qof ee ku dhintay dagaalka ayaa la sheegay in afar ka mid ah ay yihiin dhinacyadii dagaalamayay, halka qofka kale uu yahay shacab deegaankaas ku noolaa, iyadoo sidoo kale la sheegayo in dagaalka ay ku dhaawacmeen dhowr qof oo kale.
Inkastoo aan la hayn tiro sugan oo ku saabsan khasaaraha dagaalkan oo dhowr saacadood socday aan la ogeyn, ayaa haddana Goob-joogayaal ku sugan Deegaanka Xanan-buuro oo isla Gobolka Galguduud ka tirsan ayaa sheegay in khasaaruhu uu aad u fara badan.
“Dagaalku wuxuu ahaa mid Culus oo hub kala duwan la isku Weydaarsaday, inkastoo ay Xabbaadu hadda Hakatay haddana xiisad ayaa weli deegaanka ka taagan,” ayuu yiri mid ka mid ah dadka ku nool deegaanka Xanan-buuro oo Warbaahinta la hadlay.
Sidoo kale, warar kala duwan ayaa kasoo baxaya deegaanka lagu Dagaallamay, kuwaasoo qaarkood ay sheegayaan in ciidammo hor leh ay gaarayaan, kuwaas oo Dagaalkii Maanta deegaankaas ka dhacay daba-socda.
Weli kama aysan hadlin dagaalka dhinacyadii uu dhexmaray ee Dowladda Soomaaliya iyo Ahlusunna Waljamaaca, iyadoo horay loo sheegay inuu Dagaalkan ka dhashay Weerar ay xoogag taabacsan Ahlusunna ka tirsan ku qaadeen gaadiid uu watay taliyaha qaybta 21-aad ee Ciidamada Xoogga Dalka, Sulub Axmed Diiriye oo ku socday degmada Cadaado ee isla Gobolka Galguduud.
Ciidamada taliyuhu uu watay ayaa la sheegay inay ka gudbeen deegaankaas oo ay aadeen Cadaado oo ay markii horeba ku socdeen; waxaana uu ku soo beegmayaa dagaalka xilli ay socdeen dadaallo ay dowladdu doonayso inay ku qanciso Ahlusunna oo kasoo horjeesatay dhismaha Maamulka Galmudug.
Si kastaba ha ahaatee, xoogagga Ahlusunna Waljamaaca ayaa ciidamada DFS ee Gobolka Galguduud kala wareegay degmada Dhuuso-mareeb bishii Juun ee lasoo dhaafay; xilli la Doonayay in Degmadaas ay Caasimad u noqoto Maamulka Cusub ee Galmudug oo lagu dhisay degmada Cadaado.
Ceegaag-muqdisho