Guddiga Dib u Heshiisiinta Qaranka oo kulan la yeeshay Ra’iisul Wasaare Cumar Cabdirashiid

September 2 (Ceegaag)— Xubnaha Guddiga Fulinta ee Guddiga Dib u heshiisiinta Qaranka ayaa kulan la yeeshay 27-kii bishii hore Ra’iisul Wasaaraha Xukuumadda Federaalka ah ee Soomaaliya Cumar Cabdirashiid Cali Sharma’arke, iyadoo kulankan uu ka dhacay Xafiiska Ra’iisulwasaaraha.
Kulankan ayaa ku saabsanaa mid wada tashi ah oo ku aadan dib u heshiisiinta dalka iyo sidii loo dar dar gelin lahaa howlaha Guddiga dib u heshiisiinta Qaranka.
Guddoomiyaha Guddiga Dib u heshiisiinta Qaranka Ismaaciil Macallin Muuse oo hadalka furay ayaa Ra’iisul Wasaaraha uga mahad celiyay waqtiga uu siiyay Guddiga dib u heshiisiinta Qaranka si ay uga wada hadlaan arimo badan oo la xiriira dib-u hishiisiinta.
Intaas kadib, Guddoomiyaha waxaa uu faah faahin dheer ka bixiyey howlihii ugu muhimsanaa ee uu Guddigu soo qabtay muddooyinkii ugu dambeeyey, gaar ahaan sanadihii 2014 – 2015.
Guddoomiyuhu waxaa uu sawir guud ka bixiyey in ay dib u heshiisiintu u qeybsan tahay laba qeybood oo kala ah:
Ø Dib u heshiisiinta bulshada iyo deegaannada; iyo
Ø Dib u heshiisiinta siyaasadda
Dib u heshiisiinta Bulshada iyo Deegaannada:
Waxaa u warbixin ka bixiyey meelihii ugu muhimsanaa ee uu Guddiga Dib u Heshiisiinta Qaranku ka sameeyay howlaha dib u heshiisiinta bulshada iyo deegaanada, waxaana ka mid ahaa Gobolka Shabeellaha Hoose oo labo beelood ku dagaalameen.
Guddiga dib u heshiisiinta Qaranka oo kaashanaha Wasiirada ayuu sheegay inay sameeyeen dib u heshiisiin iyo wada hadal bulsho oo heer degmo iyo heer deegaan ah.
Sidoo kale Guddoomiyaha ayaa mar uu ka hadlayay dib u heshiisiin ay ka sameeyeen Shabeellaha Dhexe ayuu xusay in labo beelood oo sanad ka hor ku dagaalamay halkaas ay dib u heshiisiin u sameeyeen, isagoo tilmaamay in kulan ballaaran oo dib u heshiisiin ah uu ka dhacay degmada Jowhar.
Guddoomiyaha Guddiga dib u heshiisiinta Qaranka Ismaaciil Macalin Muuse ayaa sheegay inay sidoo kale ka qeyb qaateen shir dib u heshiisiin ah loo qabtay labo beelood oo ku dagaalamay Gobolka Hiiraan, sidoo kale waxaa uu xusay in wafdi ka socda Guddiga dib u heshiisiinta ay ku baxeen beelo ku dagaalamay Mudug iyo Galgaduud, isla markaana mar walba colaada labada beelood ay soo noq noqotay.
Guddoomiyaha Guddiga dib u heshiisiinta ayaa hoosta ka xariiqay in la qabto shir wayne dib u hehsiisiin oo la isugu keeno dhamaan qeybaha kala duwan ee bulshada si la isugu cafiyo, loona helo heshiis bulsho oo waara.
Waxaa kaloo Guddoomiyaha Guddiga dib u heshiisiinta uu soo hadal qaaday dib u heshiisiinta siyaasada, isla markaana muhiim tahay in dalka uu gaaro dib u heshiisiin waarta iyo xasilooni siyaasadeed, isla markaana dhex dhexaadin siyaasadeed laga sameeyo dhinacyada isku haya siyaasada dalka sida:-
• Puntland & Dowladda Federalka
• Puntland & Galmudug
• Galmudug & Ahlu-sunna
• Jubbaland & Dowladda Federalka
• Jubbaland & Gobolka Gedo
• Wadahadalki Somaliland & Dowladda Federalka oo horey loo sii wado.
Ugu dambeyn Ra’iisul Wasaaraha ayaa shirka soo gaba gabeeyay, waxaana uu soo dhoweeyay xubnaha Guddiga Dib u heshiisiinta Qaranka talooyinkii ay u soo gudbiyeen iyo howlihii dib u heshiisiinta ee ay dalka ka wadeen.
Ra’iisul Wasaaraha ayaa sheegay inuu garowsan yahay in Guddiga dib u heshiisiinta Qaranka uu yahay mid sharci ah, inta laga sameynayo Guddi kale oo badala, sida ku qoran dastuurka, isla markaana guddigan sii wadayp howsha dib u heshiisiinta.
Waxaa uu sheegay in dagaalo beeleedyo ay ka dhaceen Gobollada Hiiraan, Shabeellaha Dhexe iyo Hiiraan, waxaana uu ugu baaqay Guddiga inuu u istaago xalkiisa iyo sidii lagu dhameyn lahaa, isla markaana keenaan barnaamij ku saabsan habka dib u heshiisiinta loo marayo.
Ceegaag- muqdisho