Kooxo hubaysan oo laba qof ku dilay tuulada Yoontoy ee gobolka jubada hoose

Sida ay shegayaan wararka naga soo gaaraya  tuulada yoontoy ee dhinaca koonfureed ka xigta magalada kismayo, in caawa abaarihii halkii saac, kooxo hubaysan oo aan haybtooda la aqoon, ay ku dileen, haweenay iyo wiil ay eedo u tahay.

Goobjooge aan la xiriirnay  ayaa inoo sheegay in haweenayda la dilay  lagu magacaabi jiray Siciido Jaamac Cabdulle, ayadoo dilka uu ka dhacay guri ay daganayd haweeneeyda iyo wiilka ay eedada u ahayd.

“Ma garanayo cidda ka danbeeysay, laakiin ehelka haweeneyda la dilay ayaa ii sheegay in dilkani uu yahay mid salka ku hayo aano qabiil, waxaana dadka dilka geystay ay baadi goobayeen wiil ay dhashay haweeneyda oo hore u dilay sedex nin, maamada intii aysan dilin kahorna waxay weeydiyeen wiilkeeda oo lagu magacaabo Max’ed Axmed Faarax, kaasoo ay isna ku hanjabeen in ay dili doonaan,” ayuu yiri mid kamid ah dadka deegaanka oo aan wareeysannay.

Deegaanka Yoontooy oo qiyaastii 25 KM dhanka waqooyi kaga beegan magaalada Kismaayo ayaa kamid ah deegaanada ay gacanta ku hayaan xoogagga Al-shabaab.

Si kastaba ha ahaatee waxaa joogto ka noqotay deegaanada Jubooyinka dilalka ku saleeysan aanada qabiil oo ah mid leh uur ku taalo, maadama aan loo aaba yeelin dadka wax tarka u leh bulshada Soomaaliyeed, waxaana inta badan dhacda in shaksiyaadka muhiimka u ah bulshada loo dilo aano qabiil.

 

Ceegaag News Desk,

Kismaayo-Soomaaliya.