Meydka Askari Faransiis ah iyo hubkii laga furtay oo Shabaabka soo Bandhigeen

Kooxda Argagixisada Al shabaab ayaa soo bandhigtay meydka askari Faransiis ah oo habeenkii Jimaca ahayd ku dhintay weerar Ciidamada faransiiska ku qaadan Buulo Mareer oo ka tirsan Shabeelaha Hoose halkaas oo lagu haystay nin Faransiis Sirdoonkooda ka tirsanaa oo tan iyo 2009 kii gacanta ugu jiray al shabaab.

Sawirada askariga Faransiiska ah iyo qalab ciidan oo fara badan ayaa lagu soo bandhigay Websityada taageera Al-Shabaab, iyadoo qoraalka sawiradaas la socdayna lagu sheegay in warkaan uu ka soo baxay xafiiskooda warfaafinta.

War qoraal ah oo ururka Al-Shabaab uu ka soo saaray meydka askarigaas lagu baahiyay bogga Twitter-ka ay ku leeyihiin ayaa lagu sheegay in sarkaalkani uu ku dhaawacmay weerar dhowaan ka dhacay degaanka B/Mareer oo Al-Shabaab ay sheegtay in iyaga lagu soo qaaday.

Al-Shabaab ayaa sheegtay in weerarkaasi ay iska caabiyeen isla markaana ay fashiliyeen, iyagoona intaasi raaciyay inay qasaare u geysteen ciidamadii Faransiiska ahaa ee soo weeraray.

Dhinaca kale ururka Al-Shabaab ayaa sheegay in meydka askarigaasi ay ka heleen macluumaadyo fara badan, iyagoona caddeeyay in markii hore ay qabteen sarkaalka oo dhaawac ah balse uu u geeriyooday maanta.

Waxaa kale oo ururka Al-Shabaab uu sheegay inuu dhowaad warcad ka soo saarayo sarkaalka ajnabiga ah ee ay afduubka ku heystaan mudada ka badan saddexda sano, kaddib kulamo ay yeelanayaan saraakiisha sarsare ee Al-Shabaab.