Musharaxiinta Madaxweyne Ee Jubbaland Oo Qayladhaan Afkaka furtay

Xubna ka tirsan Musharaxiinta Madaxweyne ee Jubbaland ayaa magaalada Kismaayo ku yeeshay shir Jaraa’id oo  degdeg ah, kuwaasoo eedayn culus u jeediyay maamulka Jubbaland.

Musharax Sheekh Daahir Axmed oo ka mid ah musharaxiinta Madaxweyne ee Jubbaland ayaa sheegay in aanay marnaba  aqbalayn in 3 qof ay odayaasha dhaqanka soo gudbiyaan, isla markaana  guddiga doorashada mid ka xushaan, taasoo haddii ay dhacdo doorashada Jubbaland laga dhexli doono cawaaqibxumo.

Waxaa sidoo kale Musharax Sheekh Daahir uu xusay in odayaasha dhaqanka ay habboon tahay in aan lagu xarayn xarunta Daawad ee  lagu xareeyo Eeraboorka magaalada Kismaayo, halkaasoo oo uu arko goob dhexdhaxaad ah.

Musharaxa Cabdullaahi Ciilmooge Xirsi oo isagana halkaas ka hadlay ayaa maamulka Jubbaland ku eedeeyay in uu u dirsaday codsi ah inuu qabto kulan ku saabsan musharaxnimadiisa, kaasoo aan la siin wax ogalaasha ah. Waxaana musharax Ciilmooge uu ugu baaqay guddiga doorshada in ay dhexdhaxaad ka noqdaan doorshada Jubbaland ee dhawaan la qabanayo.

Waxaa sidoo kale halkaas ka hadlay Musharaxa Madaxweyne ee Seeraar, kaasoo isagana eedayn culus dusha ka huwiyay maamulka Jubbaland.