Waalidiinta Soomaalida reer Boston oo samaystay dalad midaynasa iyaga iyo dhalinyaradooda

Waxaa caawa markii u horaysay kulan ku yeeshay Tobin Community Center waalidiinta iyo dhalinta soo korasa ee Soomaalida reer Boston, kulanka ayaa lagu qaadaa dhigay lamahuraannimada midnimada Jaaliyada, iyo ku kobcinta ubadka soomaaliyeed dhaqanka soojireenka ah ee Soomaalida.

Walidiinta ayaa isku tirtirsiiyay in ay lamahuraan tahay in caruurta Soomalidu dadka kale iska aqoodaan, oo ay u sameeyaan kulan bilwalba si ay u yeeshaan isdhexgal bulshada Soomaalida iyada oo la barayo dhalinta soo korasa dhaqanka suuban ee Soomaalida.

Caruurtan ayaa ku dhashay wadankan Maraykanka ama yimid iyaga oo da’yar loona baahan yahay in ay yeeshaan xidhiidh salka ku haya Soomaalinimo iyo dan wadaag walaaltinimo oo mustaqbalka ay u aayi doonaan jaaliyada Soomaaliyeed iyo bulsho waynta Maraykanaad.