Xildhibaan Maxamed Axmed Gurxan oo u geeriyooday dhaawacii soo gaaray

November 8 (Ceegaag)—Allaha u naxariistee waxaa u geeriyooday dhaawacyo soo gaaray Xildhibaan Maxamed Axmed Gurxan oo ka tirsan Baarlamaanka Federaalka ah ee Soomaaliya kaasoo ay kooxo hubeysan ku weerareen degmada Xamar weyne ee magaalada Muqdisho.
Marxuumkan ayaa ka tirsanaa Guddiga Arrimaha Gudaha iyo Amniga ee Baarlamaanka waxa uuna ahaa Xoghayaha Guud ee Guddigaasi.
Dabley hubeysan oo gaari wadatay ayaa saaka barqadii ku toogatay agagaarka Bacadlihii hore ee Xamar weyne, xilli uu ku sii jeeday xarunta golaha shacabka.
Xildhibaanada Baarlamaanka Soomaaliya ayaa Hay’adaha ammaanka ka dalbaday inay gacanta ku soo dhigaan dadkii ka dambeeyay falka Xildhibaanka lagu weeraray.
Al-Shabaab ayaa goor sii horeysay sheegatay inay ka dambeysay weerarka, mana jirin wax war ah oo ka soo baxay laamaha ammaanka.
Waa xildhibaankii shanaad oo sanadkan gudihiis lagu dilo magaalada Muqdisho, todobaadkii hore ayay aheyd markii Xildhibaan Abtidoon lagu dilay weerarkii Hotel Saxafi.
Ceegaag.com